Þegar kylfingar hugsa til komandi golfsumars á vorin og yfir vetrartímann er til mikils að hlakka. Vorið kemur með hækkandi sól, æfingasvæði fyllast, kylfingar klæða sig í föðurlandið og arka á opna „vor“ golfvelli og fjöldi kylfinga halda til útlanda í golfferðir. Áhyggjur flestra snúast aðallega um það hvenær vellirnir opna og áður en varir eru kylfingar farnir að hópa sig saman á golfvöllum landsins og lífið snýst þá næstum því bara um að skoða veðurspár.

Hvern hefði órað fyrir því að golfárið 2020 yrði eftirminnilegt fyrir það að þurfa að hlýða Víði til að komast í golf, þvo sér hendurnar, spritta sig í tíma og ótíma, deila ekki búnaði, halda 2 metra fjarlægð, holubotnar á hvolfi, svampbotnar, engar hrífur, engar ruslatunnur og fleiri og fleiri sérreglur um ástundun golfíþróttarinnar sem innleiddar voru til þess að kylfingar gætu spilað golf á tímum samkomubanns og samkomutakmarkana. Það verður í raun að gleðjast yfir þeirri miklu aðlögunarhæfni sem golfíþróttin og kylfingar greinilega búa yfir enda leið sumarið alveg ótrúlega hratt og vel miðað við aðstæður. Smellið á hnappinn hér fyrir neðan til að lesa ávarp Kára formanns.